გაკვეთილი III-ნაყოფის განვითარება

სწავლის შედეგი

მოსწავლეს შეუძლია ამოიცნოს და აღწეროს ჩასახვიდან დაბადებამდე ადამიანის განვითარებისა ეტაპები და ფაქტორები, რომლებიც ამ პერიოდში ნაყოფის განვითარებაზე ახდენს გავლენას.

მასალა:

1. სამუშაო ფურცლები მოსწავლეებისათვის: ნაყოფის განვითარების ეტაპების მიმოხილვა
2. პასუხები: ნაყოფის განვითარების ეტაპების მიმოხილვა
3. მასალა თვალსაჩინოებისათვის: ნაყოფის სათანადო განვითარების ხელშეწყობა.

შესავალი:

მოსწავლეები განიხილავენ იმ ფაქტორებს, რომლებმაც შესაძლებელია გავლენა იქონიოს ნაყოფის განვითარებაზე, ჩასახვიდან დაბადებამდე პერიოდში.

მიდგომები/სტრატეგია:

ა. ძირითადი წესები (5 წთ.)
ძირითადი წესების შესახებ შეთანხმება უნდა შედგეს გაკვეთილის დაწყებამდე. იმ კლასებში, სადაც ძირითადი წესები უკვე წინასწარ არის ჩამოყალიბებული და შეთანხმებული, მოკლედ მიმოიხილეთ ისინი, გაკვეთილის წარმატებით წარმართვის მიზნით.

ბ. ნაყოფის განვითარების ეტაპების მიმოხილვა (5-10 წთ.)
მოსწავლეები დამოუკიდებლად მიმოიხილავენ ნაყოფის განვითარების ეტაპებს.

1. დაურიგეთ მოსწავლეებს სამუშაო ფურცლები „ნაყოფის განვითარების ეტაპების მიმოხილვა“.
2. სთხოვეთ მოსწავლეებს დანომრონ ეტაპები სწორი თანამიმდევრობის დაცვით.
3. მოსწავლეთა ნამუშევრები შეამოწმეთ „ნაყოფის განვითარების ეტაპების მიმოხილვის“ პასუხების გამოყენებით.
4. ათვისებული მასალის შესაჯამებლად, მოსწავლეებს დაუსვით შემდეგი კითხვა:
   ნაყოფის განვითარების ეტაპებს შორის არის ისეთი ეტაპი, რომელიც თქვენი თვალსაზრისით ყველაზე მნიშვნელოვანია? რომელი მათგანია ყველაზე მნიშვნელოვანი და რატომ?

გ. ფაქტორები, რომლებიც გავლენას ახდენს ნაყოფის განვითარებაზე (10-15 წთ.)
მოსწავლეები განიხილავენ დაბადებამდე ნაყოფის ჯანმრთელობის მნიშვნელობას.

1. რამ შეიძლება გავლენა იქონიოს ბავშვის განვითარებაზე მუცლად ყოფნის დროს?
   თამბაქოს მოხმარება (როდესაც დედა არის მწეველი ან მას მწეველთა გარემოცვაში უწევს ყოფნა), ალკოჰოლისა და ნარკოტიკების მოხმარება, დედის კვება, დედის ზრუნვა საკუთარ თავზე.
2. რა უნდა გააკეთოს დედამ, რომ საკუთარ მომავალ შვილს ნაყოფის განვითარებისათვის საუკეთესო პირობები შეუქმნას?
   – თავი შეიკავოს თამბაქოს მოხმარებისაგან, ან თამბაქოს მომხმარებელთა წრეში ყოფნისაგან.
   – თავი შეიკავოს ალკოჰოლისა და ნარკოტიკების მოხმარებისაგან.
   – გაიაროს ექიმთან კონსულტაცია, ორსულობის დასაწყისში და მთელი ორსულობის განმავლობაში. ბევრი ქალი გადის ექიმთან კონსულტაციას ორსულობამდეც, რათა დარწმუნდნენ რომ მათი ჯანმრთელობის მდგომარეობა ხელს არ შეუშლის მათ ორსულობასა და ნაყოფის სათანადო განვითარებას.
   – მიიღონ ჯანსაღი საკვები და დაიცვან ჯანსაღი კვების რეჟიმი.
   – ბევრი დაისვენონ და ამავე დროს დაკავდნენ ფიზიკური ვარჯიშით.
3. რა უნდა გააკეთოს ბავშვის მამამ იმისათვის, რომ მომავალ შვილს ნაყოფის განვითარებისათვის საუკეთესო პირობები შეუქმნას?
   – ჯანსაღი ცხოვრების მაგალითი აჩვენოს მომავალ დედას (მაგალითად თამბაქოს მოხმარებისაგან თავის შეკავება).
   – მოამზადოს ჯანსაღი საკვები.
   – დაეხმაროს მომავალ დედას სახლის საქმეში, რათა მას მეტი დრო ჰქონდეს დასასვენებლად.
   – დაესწროს მომავალი დედის ექიმთან ვიზიტებს და მასთან ერთად იაროს სხვა შეხვედრებზეც.
4. რა უნდა გააკეთონ გარშემომყოფებმა იმისათვის, რომ ჯერ არ დაბადებულ ბავშვს ნაყოფის განვითარებისათვის საუკეთესო პირობები შეუქმნან?
   – ჯანსაღი ცხოვრების მაგალითი აჩვენონ მომავალ დედას (მაგალითად თამბაქოს მოხმარებისაგან თავის შეკავება).
   – დაეხმარონ მომავალ დედას სახლის საქმეში, რათა მას მეტი დრო ჰქონდეს დასასვენებლად.
   – გაუღონ მას კარი, მოეხმარონ მომავალ დედას ტვირთის ზიდვაში, დაუთმონ მას ადგილი საზოგადოებრივ ტრანსპორტში.
5. ვისი დახმარებით შეუძლია ისარგებლოს მომავალ დედას?
   – ექიმის
   – საზოგადოებრივი ჯანდაცვის სფეროში დასაქმებული ექთნის
   – მეანის
   – სპეციალური პროგრამების (ჯანსაღი კვების შესახებ, ალკოჰოლისა და ნარკოტიკების მოხმარების წინააღმდეგ და ა.შ.)

დ. ნაყოფის სათანადო განვითარების ხელშეწყობა (20-25 წთ.)
მოსწავლეები ამზადებენ პოსტერებს ან ბროშურებს სხვადასხვა აუდიტორიისათვის, რომლებშიც ისინი იძლევიან რჩევებს ნაყოფის სათანადო განვითარებასთან დაკავშირებით.

1. მოსწავლეებს გააცანით მასალა თვალსაჩინოებისათვის „ნაყოფის სათანადო განვითარების ხელშეწყობა“.
2. აუხსენით მოსწავლეებს, რომ მათ უნდა მოამზადონ მასალა (პოსტერი, ბროშურა ან პრეზენტაცია), რომელშიც ნაყოფის სათანადო განვითარებასთან დაკავშირებული რჩევები იქნება მოცემული.
3. მოსწავლეების მიერ მომზადებული მასალა საკლასო ოთახში გამოფინეთ.
4. მოსწავლეების მიერ ათვისებული მასალა შეაჯამეთ მათთვის შემდეგი კითხვების დასმით:
   – ვისთვისაა განკუთვნილი თქვენ მიერ მომზადებული მასალა?
   – ჩვენი საკლასო ოთახის გარდა, სად შეიძლება განთავსდეს თქვენ მიერ მომზადებული მასალა?
5. მოსწავლეებს ურიგდებათ სამუშაო ფურცლები: „აივ და შიდსი და ჰეპატიტი A, B და C“ რომლებიც მათ საშიანო დავალების ფორმით უნდა შეასრულონ მშობლისა ან მეურვის დახმარებით.

კითხვების ყუთი (10 წთ.)
სთხოვეთ მოსწავლეებს საკუთარი კითხვები დაწერონ ფურცლებზე და მოათავსონ ისინი კითხვების ყუთში. მოსწავლეების მიერ დასმულ კითხვებზე პასუხების გაცემა მომდევნო გაკვეთილისათვის დაგეგემეთ.

საშინაო დავალება
მოსწავლეებს დაავალეთ კლასში ათვისებული მასალა გაუზიარონ საკუთარი ოჯახის უფროსი თაობის წარმომადგენლებს.

კითხვები გაკვეთილის შეფასებისათვის

გაკვეთილის მსვლელობისას:

1. დაცული იქნა თუ არა ძირითადი წესები?
2. მოხდა თუ არა ჯგუფური მუშაობისა და საკითხებზე მსჯელობის კარგი პრაქტიკის ჩამოყალიბება?

რა ცვლილებებს შეიტანდით იგივე ჯგუფთან შემდგომში მუშაობის გეგმასა და ფორმატში?
რა ცვლილებებს შეიტანდით სხვა ჯგუფთან იგივე გაკვეთილის გეგმასა და ფორმატში?

მოსწავლეთა შეფასება

გაკვეთილის დროს მოსწავლეებმა შეძლეს:

ცოდნა:

• იმ ფაქტორების იდენტიფიცირება, რომლებიც გავლენას ახდენს ნაყოფის განვითარებაზე?
• ნაყოფის სათანადო განვითარების ხელშეწყობის გზების აღწერა?

უნარები:

• მასალის შექმნა, რომელშიც ხაზგასმულია ნაყოფის სათანადო განვითარების მნიშვნელობა?
• მთელი კლასის მონაწილეობით მიმდინარე დისკუსიებისას, მოსმენისა და საუბრის სათანადო უნარების გამოვლენა?

დამოკიდებულებები:

• გაეცნობიერებინათ, რომ ბევრი ადამიანია გარშემო, რომლებსაც შეუძლიათ დაეხმარონ მომავალ დედას იმაში, რომ ნაყოფი იყოს ჯანმრთელი?
• გაეცნობიერებინათ, რომ მათ შეუძლიათ საკუთარი წვლილი შეიტანონ ნაყოფის სათანადო განვითარების საქმეში?